Kua hoki mai Ngā Tohu Reo Māori
18 o Oketopa, 2023, HE WHAKAHOUNGA: Kua whakaroangia te rā kati mō ngā tono me ngā tautapanga mō Ngā Tohu Reo Māori mai i te 23 o Oketopa ki te 10 o Tīhema, 2023, ā, ka tū te kai tuku tohu ki Te Whanganui-a-Tara, ki Tākina. Hei urupare i ngā tono a te hapori, kua whakaroangia ake te wā tono i te 2.5 wiki kia 9 wiki kē te roa.
Ka tū te hākari tuku tohu o Ngā Tohu Reo Māori ināianei hei te 26 o Āperira, 2024.
E hiamo ana a Te Taura Whiri i te Reo Māori ki te pānui kua tuwhera ōkawa ngā tautapanga mō Ngā Tohu Reo Māori.
He taiopenga ā-tau Ngā Tohu Reo Māori e whakanui ana i ngā haumāuiui a tētahi tangata, a tētahi whakahaere hoki, kua nui nei te whakapau kaha mō te whakarauora, mō te whakamāori hoki i te reo Māori te take.
Kāore anō Ngā Tohu Reo Māori kia tū, atu i te 2019, nā ngā whakapōreareatanga o te Kowheori-19. I whakatūria e mātou tētahi taiopenga motuhake, i kīia rā ko Ngā Kākā Kura, i te tau 2022 ki te whakanui i ngā hekenga werawera whakaharahara ki te whakarauora reo i ngā tau e 50 kua hori, hei whakanui i te huritau 50 o Te Petihana Reo Māori.
Ko te taiopenga 17 tēnei kua whakahaeretia e Te Taura Whiri i te Reo Māori, atu i te tōna rewanga tuatahitanga i te tau 2004.
Ka tū ngā Tohu Reo Māori hei te Paraire, te 26 o Āpereira, 2024, ki Te Whanganui-a-Tara.
E whai ana mātou i ētahi tautapanga ki ngā kaupapa e iwa, ka tukuna rā ki Ngā Tohu Reo Māori 2023:
Te Ao Matihiko – Digital Award
Te whakanui i te auahatanga ā-matihiko mō te reo Māori
Ngā Toi – Arts Award
Te whakatairanga i te reo Māori mā te toi
Hapori – Community Award
Te whakapakari i te reo Māori ki te mātinitini
Pakihi – Business Award
Te kounga o te whakatairanga a te pakihi i te reo Māori
Mātauranga – Education Award
Te pākaha o ngā mahi whakaako me te ako i te reo Māori
Te Ao Pāpāho – Media Award
Te mahi nui whakaharahara mō te reo Māori i te ao pāpāho
Te Rāngai Tūmatanui – Public Service Award
Ngā kaupapa kāwanatanga mō te reo Māori
Rangatahi – Youth Award
He aumangea rangatahi mō te reo Māori
Te Tohu Whakaharahara o Tū Rangatira
He toka tū moana - Te whakatinana i ngā mahi rangatira me te tū hei tino aumangea mō te reo Māori
Ko Te Tohu Oranga Angitū te tohu tekau, ā, ka pānuitia te kaiwhiwhi ā te pō tonu.
Mō te whakaroanga ake o ngā whakamārama mō ia tohu, pāwhiria a konei.
E āki ana mātou i ngā tāngata katoa o Aotearoa kia taupatatia ngā tāngata me ngā kaupapa, ki ō rātou whakaaro, kua tino whai hua ki te reo Māori.
Me pēhea te tautapa
Ki te mōhio rānei koe ki tētahi tangata, ki tētahi whakahaere rānei, i tōna tikanga me whakanui ki tētahi o ēnei tohu, tukuna tō tautapanga ā-ipurangi ki konei.
Ka rarawe noa iho ana te whakamahia - kōwhiria noa te kaupapa e hiahia nei koe kia tukuna tō tautapanga, ā, ka uia koe ki tētahi rārangi pātai. Ka āhei tō tautapa i a koe anō, i ētahi atu rānei.
I te mutunga o te puka, kei rēira tētahi kōwhiringa kia āpitihia ētahi pitopito kōrero anō, ētahi taunakitanga rānei kāore i kapi i ā mātou pātai. Ka hiahia pea koe ki te tukuatu i ētahi kōnae e hāngai ana, i ētahi kiriata, i ētahi hononga rānei. Ka tirohia e ngā kaiwhakawā ngā tautapanga e āta whakamārama ana i ngā mahi pai kua oti i te tautapa te mahi hei whakarauora, hei whakamāori hoki i te reo Māori.
Me tuku ngā tono mā ngā puka e whai wāhi atu ai ki ngā tohu.
Karawhiua, e hoa mā! Kia whakanuia e tātou ngā toa o te reo Māori!
Mēnā he pātai āu, tēnā īmērahia a [email protected]